كتب الراحل المقيم الأستاذ محمد شاطر في قروب آفاق ثقافية بوستا كهربائيا عالي الضغط للسيد وزير الطاقة ورأيت أن انشره وهو مكتوب بلغة عامية فصيحة ولكنها أقرب إلى المواطن العادي والبوست يحمل حلول مشكلة الكهرباء في البلاد . ويقول محمد شاطر ( السيد وزير الطاقة ، لقد كتبت في هذه الصفحة عدة مرات عن موضوع الكهرباء – مع أني لست خبيرا- انو الموضوع لازم يكون أولوية اولى للدولة ما يخلوه لوزير او وكيل وزارة وحده وقلت ان الملك فهد رحمه الله عين غازي القصيبي مخصوص لحل مشكلة الكهرباء وكان عنده اكسيس مباشر معه..وقبله اول عمل عمله لينين وصل أماكن الانتاج بالطاقة… مطلوب من اي رئيس وزراء قادم تصميم خطط للوزارات من مستشاري وفنيي الوزارة ويمكن الاستعانة ببيوت خبرة أجنبية والوزير مطلوب منه التنفيذ مع السماح له بوضع بصمته.. انت يا جادين بدلا ان تكرر انو ٦٠٪ من السودان بره الشبكة ورينا عملت شنو في ال ٤٠ اللي بتؤثر الكهرباء على حياتهم تأثيرا مباشرا.. ما ممكن كل يوم تصريح يناقض اللي قبله ثم تجينا تقول ان شعب الخرطوم اكتر شعب بذخي في الكهربا جنوب الصحراء ، انا ماعارف مكنة جنوب الصحراء دي الوراها للناس ديل منو اي حاجة داير يمرقوا منها يقول ليك اكبر كبري جنوب الصحراء واول بروفيسر في المجال ده جنوب الصحراء… مع انو استهلاكنا للكهرباء يعتبر من اقل المعدلات في العالم والارقام منشورة في السايبر تسمع البذخ تقول نحن قاعدين نحمص البن بالكهربا ونجري بالسير الكهربائي… ونشغل جهاز التدفئة… نحن موضوعنا كله لمبة ومروحة وتلاجة ان وجدت… لا ترم اللوم على المواطن بدلا من ان الاعتراف بالقصور
قصر الكلام موضوع الكهربا لازم يكون اولوية واطلعو من سالفة ال ٤٠٪ دي لانو مافي انتاج بدون كهربا والدولة التي حررت سعر الوقود ورفعت الدولار الجمركي مفترض تكون توفرت عندها موارد.. عاجلا تجيب محطات متحركة زي التركية وتشرع في بناء الخطوط الناقلة بين مصر والسودان ممكن نشتري لحد ٢٠٠٠ ميقا من مصر لانو عندهم فائض وكشغل مؤسس نشرع في بناء محطات التوليد حراري طاقة شمسية رياح بالقروض او بنظام البوت) . انتهى
خروج اول
انا ايضا لا أفهم في الكهرباء ولكن ما قال به الأستاذ محمد شاطر أقنعني أكثر من تصريحات السيد وزير الطاقة ومدير شركة الكهرباء
سفر القوافي محمد عبدالله يعقوب الراحل المقيم شاطر يحل مشكلة كهرباء السودان !!
