عوارات وشتارات سودانية كتب الاستاذ /محمد عبدالرحمن ادم عبدالله ابوترتيل

يبقي السودان ذلك القطر المتميز المترامي الاطراف المتنوع السحنات والاجناس والديانات والثقافات والعادات والتقاليد اضافة الي تنوع المناخ ومجاورته لاكثر من ثمانية دول بعد انفصال جنوب السودان في العام 2011 م وفق اتفاقية السلام الشامل (C.P.A)comperhencive peace agreement ولم نستفيد من هذاالتنوع الاثني والمناخي كما استفادت كثير من دول العالم وبنت حضارات ودول ونحن لانزال نمارس في كثير من العوارات والشتارات
وعواراتنا السودانية تتمثل في لازم يكون عندك مربوع كبير تبنيه خلف خلاف حتي لو اسرتك بسيطة لاتتعدى متوسط الاسرة خمسة افراد ولا نعرف زراعة البيوت ومانحتاجه من خضروات وفواكه رغم تنوع المناخ ووفرة المياه والتربة وتعمل لك 3 امتار من الشارع درابزين نظام تقلع حقك من الحكومة بالاضافة الي سبيل خارجي بمزيرة وتشيل لك تاني من الشارع مترين بالجمبة وكل يوم الصباح تعبي الموية وخلاص ولا نظافة ولا متابعة وعيك ياحمي الضنك والملاريا..
لازم يكون عندكم بلاعة خارج الحوش تغطوها بصينية قديمة وحولها لبلاب يضاريها وكل يوم تقطفوها في الشارع ولابد يكون عندكم زقاق مهجور للكراكيب والقمامة من كل اغراضكم من احذية وملابس قديمة وباقي المراتب وغيره..يوميا تلموا زبالة بيتكم وتضعوها جمب الباب وتاني يجو الجنقو يبركتوها وترجع لكم تاني جوة…شفت كيف ياسيد ابوك في كل بيت لازم يكون نور الشارع والحوش مضوى ليل نهار وفي ماسورة مكسورة او حالجة بتنقط نقطة نقطة …والعجب الوضوء من الماسورة مبالغة هل تصدق ثبت بالبحث انه اهلنا السودانين الواحد بتوضا من الماسورة بجردلين موية وخصوصا بالمساجد وتحلو الونسة في الوضاية ومايستهلك من ماء زلال حلو المذاق علي وضابات المساحد من ماء يروي 30 % من جملة سكان السودان وكان شفت ياسيدى مانرميه في الزبالة من اكل حاجة تفلقك وتصيبك بالصرع.
هنالك من يحتاج لهذا الطعام واولهم انت ياشيخ العوارة لما تفلس وتتدين عشان تاكل…
الموضة كمان كل واحد يكون عنده ضلفة مليانة ملابس ماقاعد يلبسها وناسي انه حيموت..
عوارات …..عوارات بيوت البكاء والاتراح ميتة وخراب ديار ولا اعتبار لحقيقة الموت وفقدان المتوفي الراحل بلا عودة …اكل خمج وكل بيت بشفعه وعياننه يجوا العزاء واهل الميت فواتيرهم في السماء ويمتد العزاء والفراش للاقرباء والمالحقوا حضروا والبجي براه والكان ماعارف انه الميت بقرب لهم بحبوبة خالة عمته اخت ابوه ..وشفتي كيف ياحاجة فاطنة دلع العيال وتعليمهم عادة انوم للضحي والواحد مابعرف افرش ملاية سريره النام عليه في الحوش ولا يدخل الفرش والسرير ودا ولدى الوحيد ودا ود النديهة .
نحن اكثر شعب بستهلك سكر وملح وزيت في افريقيا والشرق الاوسط وبلاد مابين النهرين في افريقيا جنوب الصحراء واكتر شعب يصاب بالسكر وضغط الدم وامراض المعدة والمصران من تلك العادات والعوارات الغذائية المهببة ..حتي دكاترتنا عندهم تصرفات الواحد لازم يشغل المعمل والصيدلية تبعه او باتفاق مع اهلها واصحابه حتي لو عضك كلب لازم تفحص ولازم تشيل لك كيس كبير مليان دواء وعلاج وبعد يومين ترميه في الزبالة او باب التلاجة وشوف عيني ايام حمي الضنك شفت لي اتنين بعتلوا لك في كراتين دربات وحقن وطعانات لمرة وبتها لحدي ماقلت امكن يكون في شيلة عرس جات بالغلط في المركز الصحي وقربت ازغرد عشان النسوان مشغولات بالشمارات والواتس والفيس والماسنجر في العيادة وحمي الضنك…
ودي من عندي انا براي واحدة قالو سالت قوقل قالت له جارتنا حليمة طلقوها في شنو ولما غلبتوا الاجابة قالت له شابكننا عمك قوقل عارف اي حاجة وجاغمها ..يايومة حليمة طلقوها عشان فلعت راجلها بيد الفندك ….قام عمك قوقل قال لها اطرشني ياحلوم.
هوي يازول ثقافة سودانية وشطارة محلية وفلاحة طبية تمشي الصيدلية وتعوج خشمك ادينا استروبتومايسين واتنين شريط فلاجين وتلاتة فتايل كوكولاجين بالعجين وحبوب ضغط لخالتي السرة وسكر السكرى من غير فحص او وزن وبتاع الصيدلية شاطر وبياع يقول لك عندنا حبوب تسمين للشابات واحذية السكرى وبنشتري دولار ريال شيك سياحي ولو ماشي العمرة مر علينا ولو عندكم شقق ايجار غايتو جنس عوارة .
تعال ياباشا شوف العوارة الزى العوارة البتشبه العوارة تلقي لك واحد كاتب علي دكان حلاقة كاتا فلامنقو بالطماطم CATA flamengo بالطماطم اعوج خشمه وهو ماعارف التكتح وصالونه في ام صفقا عراض وتاني واحد.كاتب هاف موون half .moon نصف القمر في حلة الدشينابة ..وفي مرة من ذات المرارات والعوارات وايام المليونيات وقفيل الكباري والشوارع والاسواق والزقاقات كنت راجع من الخرطوم لام درمان من الشغل وديك يالزحمة واللخمة وتيت تيت وحمدتي حديد وحنبنيهو وبنكسروا … وضربنا لك الونسة مع شباب الحلاقات المامعروفة شنو ومن الطرايف والعوارات واحد عامل فيها بعرف انجليزى ومجضمه ويعوج في خشمه قام صاحبه قال لي ياعمك الفردة دا طالع فينا باغنية حافظة بموسيقتها ولما تفحصناها وعرفنا الانجليزى طلعت اعلان ودعاية لبمبرس هههمههههه.
نحن هنا في السوق وكل واحد رابط له ميكرفون ويكورك ويبرطع تريللللي وزبون مايجلي وتشيل ماتخلي وكل حاجة بتلاتة ونص …مفتاح البيبسي بتلاتة ونص ..قوارة المحشي بتلاتة ونص ..وتشيل ماتخلي بتلاتة ونص …ولحظات وجاء واحد سرق له طبلة من البضاعة وطوالي البياع صاح ….والسرق الطبلة بتلاتة ونص ..براحة عمك جاء راجع دفع وفات في شارعه..المشكلة كل الناس بتكورك وتصيح وتعلن كانه البشتري بشوف باضانه…
تاني ياعمك العرسان الواحد خاطب 13 سنة ماقادر اعرس ولما اهله يحاولوا يساعدوه ويعرسو له ويلموا الولد والبت تلقاهم العروسين عاوزين حنة وقعدة وقونة وضبايح ودلوكة وجرتق واستوديو وفيديو ورقيص سلولي وشهر عسل حتي لو بالدين …والقسيمة بعد تعب ادفعها خال العروس عشان افرتق الصيوان والضيوف والمعازيم وصعاليك الحلة ..
وداخت العروس يحجز للعرسان شقة 72 ساعة بعد ماتعصره امه وتقول له تعبنا من صاحبات العروس وكسروا لنا سرايرنا وسرقوا تلفوناتنا الرسول ياعبده ياولدي اجر الشقة وفرتق اللمة دي وخلينا ناخد لنا جمة.
بالمناسبة نسيت حاجة كدا عاملة لي زنة في راسي وطوالي بتقطع حبل تفكيري بالمدينة لازم يكون عندكم كونتينار او حاوية عشان يقولو البيت الفيهو الكونتينار وتلقاها فاضية مافيها الا الفيران وسعرها ابني لكم طابق تاني فوق بيتكم دا لكن لزوم الموضة والاستايل.
بس كدا .
غايتو مبالغغغغغغة يااهلنا السودانين ونعود تاني مرة لكثير من العوارات والشتارات .
ودمتم بعافية