فى طريقه إلى..المستحيل ..
الممتلئ بالاشواك والمتاريس وصل طالب… المستحيل ..
إلى قناعة تامة أنه وبمعايير البشر وما يتاح لهم من أسباب وإمكانات مادية وكافة التقنيات الحديثة ..وصل إلى قناعة أن الوصول إلى……..
….صنعاء المستحيل… قد يصل إلى درجة الاستحالة …
فكل الشواهد والشهود تجعل مرافعته الاجتماعية ضعيفة هزيلة غير مقنعة لقاضى المحكمة ليحكم لصالحه بنيل المستحيل وبالفعل صدر الحكم بعدم قبول المرافعة الاجتماعية وشطب دعوى طالب المستحيل…. فرفع طالب المستحيل استئنافه إلى محكمة لا يظلم فيها أحد…..
وقد رسم طالب المستحيل استئنافه بكلمات كتبت بمداد من دماء يقول فيها……
داير اقرب من حماك بس تعاكسنى الظروف….
داير اطردك من جواى ما سمح قلبى الولوف….
لو قدرتى تبقى شتلة شتلة وارفة وانت عارفة وقلبى ليك يصبح جروف…
لو قدرتى تبقى نسمة نسمة حالمة استقبلك فوق فى السقوف..
لو قدرت تبقى موية شربة منك تسري فى الجوف كالسروف….
لو بيدى شلت من عمري سنين بس مستحيل اثر السنين يمحاهو خوف…
داير اغامر داير اخاطر داير اسافر فى بحارك لا فى مركب لا فى طوف….
داير اسطر داير اعبر بالكلام ومنى تاهت منى راحت كل حروف….
داير انافس كيف انافس والقى مقعد فى قليبك وعاشقين واقفين صفوف..
داير اعاين فى عيونك واحكى لي الناس عن فنونك فجأة يتملكنى خوف…
لو قلتى بيت يحرمنى منك ناس بتهنا فى القاطاطى وناس بتسعد فى الكهوف….
لو قلتى مهرك جد كبير ومال كتير انت احلى انت اغلى من ملايين الألوف….
من زمان اهلنا قالوا السعادة فى راحة البال ماها فى المال بالكتوف….
حبى ليك اكبر كبير واكتر كتير وصفو أعجز كل انغام والحروف …
لو كتب فيك النشيد أو نظم فيك القصيد ملت الكتب كل الرفوف ….
عسل الكلام الدايرو منك وارضى عنك كلمة من اربع حروف …
بالالف اسعد كتير وكاد اطير وحبى… ليك… فاق الوصوف ..
بالحا حزين لو فقدتك والحزن. …افقدنى….. شوف
بالبا بقيت داير رضاك وعشان… رضاك… أسعى واطوف ….
بالكاف كفاية الشفتو منك قلبى ليك أدى التمام وأعلن وقوف….
لو بالنزال أو بالكتال تدخل حصونك كنت استليت سيوف…..
بس كل القلوب يهديها ربى فهو حسبى هو الرحيم هو الرؤوف…..
لو بالقدر اخترت غيرى برضى راضي وليك بفرح وبيك عطوف…..
لو من زمان مكتوبة ليا أنا السعيد ادخل معاك الجنة توف …..


