المصائب لا تأتي فرادى ، فبعد أن تخلصنا من مليشيا الجنجويد في العاصمة الخرطوم ، تفشي وباء الكوليرا بأم درمان ( بلد الأمان ) ولاحول ولا قوة الا بالله العلي العظيم ، وإعلنت حالة الطواريء في جميع المستشفيات ، وفي بيان لشبكة أطباء السودان قالت فيه :(( أن هناك 183 حالة إصابة بالكوليرا في مستشفى النو، إضافة إلى رصد حالات جديدة في مستشفيات بشائر، التركي، والبان جديد، مما يعكس تدهورًا متسارعًا في الوضع الوبائي بالعاصمة الخرطوم.
ونظرًا لتجاوز العدد الإجمالي للمرضى الطاقة الاستيعابية لمستشفى النو، تم نقل عدد من الحالات إلى مدرسة جُهزت كمركز عزل مؤقت. وفي الريف الشمالي لأم درمان، استقبل مرفق صحي في الجزيرة “اسلانج” أكثر من 60 حالة إصابة جديدة، معظمها من النساء وكبار السن والأطفال، فيما تم تسجيل ثلاث وفيات جديدة في نفس اليوم.
كما أعلنت تنسيقية لجان مقاومة كرري بولاية الخرطوم، حالة الطواريء الصحية بعد تفشي وباء الكوليرا، حيث استقبل مركز العزل بمستشفى النو بأم درمان أكثر من 200 حالة إصابة مؤكدة، مما أدى إلى إغلاق كافة المحال التجارية شمالي المستشفى، ونقل موقف المركبات إلى موقع بديل لتقليل فرص العدوى.
دعت التنسيقية السلطات والمواطنين إلى التعامل بجدية مع حجم “الكارثة” الصحية التي ضربت المنطقة، وسط مؤشرات على توسع نطاق انتشار الكوليرا، بالإضافة إلى ظهور حالات مصاحبة من حمى الضنك والملاريا، خاصة في المناطق الجنوبية من أم درمان والريف الشمالي وجنوب الحزام )).
وللوقاية من هذا المرض القاتل عممت وزارة الثقافة والإعلام ولاية الخرطوم منشورا تحت عنوان ( رسائل توعوية ) كتب بلغة بسيطة للمواطنين للعمل به في حالة ظهور الاعراض على اي فرد داخل الاسرة جاء فيه : (( “الكوليرا ما بتهزر، في ساعات ممكن تسبب جفاف شديد وموت..
شنو يعني كوليرا؟
الكوليرا مرض بكتيري خطير، بنقلو الموية أو الأكل الملوث. بيعمل إسهال شديد جداً، ممكن يخلي الزول يجف بسرعة شديدة ولو ما اتعالج ممكن يموت، لا قدر الله.
أعراض الكوليرا:
إسهال مائي شديد (زي موية الرز ، يعني خفيف وما عندو ريحة او مرات بتشبه ريحة السمك )
ترجيع ( استفراغ او طراش )
عطش شديد
جفاف (الجلد ينكمش، العين تغور)
اعياء (ضعف عام )
كيف نمنع الكوليرا؟
1. الموية النظيفة:
لو بتشرب موية من الحنفية أو البئر، لازم تغليها أو تحط ليها كلور (5 نقط لكل لتر وتخليها 30 دقيقة قبل الشرب).
اصلا مافي زول عندو كلور في البيت لو لقيت طريقة اشتريهو ولو مافي المهم النظافة والتعقيم أو اشرب موية معبأة مضمونة.
2. النظافة الشخصية:
أغسل يديك بالصابون قبل الأكل وبعد الحمام [ ليه بعد الحمام عشان البكتريا دي بتكون قاعدة في البراز وما تنتقل عن طريق يدك فهمت يا بشر ؟ ].
ما تاكل من زول ما واثق من نظافته.
نظّف الخضار والفواكه كويس قبل الأكل.
3. الأكل النضيف:
كل الأكل لازم يتطبخ كويس ويتاكل وهو ساخن.
أبعد من الأكل المكشوف في الشوارع.
4. الصرف الصحي:
حاول ما تخلي الموية الوسخة ترجع تدخل البيت.
لو في حالة إسهال في البيت، لازم تتصرف صح: نظافة، كلور، وأوعي تخلي أي حد يشرب من نفس الموية.
لو ظهر عندك أو عند زول قريب الأعراض دي:
أمشي أقرب مركز صحي فوراً.
طيب لو ما لقيت مركز فاتح يوم الجمعة الصباح مثلا والحالة ساءت والمستشفى بعيد سوي الكلام دة لحدي ما تلحقوا للمستشفى:
عالج بالجفاف (ORS) من أول لحظة: كل نص كباية بعد كل مرة إسهال.
طيب اكيد ما فهمت يعني شنو (ORS)
يعني محلول الإماهة الفموية، ودا عبارة عن بودرة ( في الصيدلية ) فيها أملاح (صوديوم، بوتاسيوم) وجلوكوز، بتنخلط مع ماء نضيف أو مغلي ومبرد، وبتتعطى للمريض عشان تعوض السوائل والأملاح البفقدها في الإسهال. طيب لو ما لقيت البودرة في الصيدلية اوريك تعمل شنو :
(6 ملاعق صغيرة )سكر
(نصف ملعقة ملقعة) ملح
1 لتر (يعني حوالي 4 كوبايات كبيرة) من ماء نظيف مغلي ومبرد
الطريقة:
1. امزج السكر والملح مع الماء كويس لحد ما يذوبوا.
2. تأكد الطعم ما يكون مالح زيادة (يكون زي طعم دموع العين تقريباً).
3. خليه في زجاجة نظيفة، واستعمله خلال 24 ساعة.
4. كل ما يسهل خليه يشرب حوالي 200 لي 400 مل يعني زي رطل تقريبا عشان نعوض فقدان السوائل دة بالنسبة للكبار إما لو طفل خليه يشرب زي نص رطل ٢٥٠ مل في الحدود دي
ما تنتظر تسوء الحالة
((( إذا الحالة ساءت لازم مستشفى عشان يتلحق بالسوائل الوريدية وياخد مضادات حيوية للحد من البكتريا دي )))
رسالة أخيرة: الكوليرا مرض بنقدر نتحكم فيهو لو اتصرفنا بوعي. الوعي مسؤوليتنا كلنا. أنقذ روحك وروح أهلك بنشر المعلومة دي )) ۔ انتهى ۔
خروج اخير
سلمكم الله من الكوليرا ۔۔ وجنب بلادنا المحن والإحن ما ظهر منها وما بطن ۔۔ وإنا لله وإنا إليه راجعون ۔
سفر القوافي محمد عبدالله يعقوب الصبر في زمن الكوليرا ۔۔ وغدا ستتفتح الزهور !!
